ජානක තේනුවරඇම්නෙස්ටි ඉන්ටර්නැෂනල් සංවිධානයේ ලන්ඩන් මූලස්ථානය පසුගිය අඟහරුවාදා ලංකාවේ පිහිටි මානව හිමිකම් සංවිධානවලින් විමසා සිටියේ කිසියම් පුද්ගලයෙකු ලංකාවේ පාර්ලිමේන්තු මන්ත‍්‍රීවරයෙකු වශයෙන් පත් වූ විට ඔහුට යුධ අපරාධ හෝ සාමාන්‍ය අපරාධ චෝදනාවලින් නිර්මුක්තියක් හිමිවන්නේද යන්නයි. ලංකාවේ මන්ත‍්‍රීවරයෙකුට එවැනි නිර්මුක්තියක් හිමි නොවන බවත්, ඔවුන්ද නඩු පැවරීමට යටත් බවද දැනගන්නට ලැබීමෙන් ඇම්නෙස්ටිය ද වික්ෂිප්තභාවයට පත්විය.
කරුණා අම්මාන් නොහොත් කර්නල් කරුණා නොහොත් ගරු විනයාගමූර්ති මුරලිදරන් මැතිතුමා එක්සත් ජනතා නිදහස් සන්ධානයේ ජාතික ලැයිස්තු මන්ත‍්‍රීවරයෙකු ලෙස පත් කරනු ලැබ පාර්ලිමේන්තුවට පිටත් කර හැරීම ඇම්නෙස්ටිය මේ ප‍්‍රශ්නය විමසීමට නිමිත්තයි.
ඇම්නෙස්ටිය කල්පනා කරන්නට ඇත්තේ කරුණාට විරුද්ධව නඩු පැවරීම සඳහා (ඔවුන්ට අනුව ස්වාධීන ආයතනයක් වශයෙන් පැවතිය යුතු) නීතිපති දෙපාර්තමේන්තුව විසින් ක‍්‍රියා කිරීම වැළැක්වීමට ආණ්ඩුව විසින් මෙම පියවර ගන්නට ඇති බවයි. එය තර්කානුකූල විග‍්‍රහයකි. එහෙත්, ලංකාවේ පාර්ලිමේන්තු මන්ත‍්‍රීවරුන්ට නඩු පැවරීමෙන් නිර්මුක්තියක් නැති බව පැවසීමෙන් ඔවුන්ගේ ඔළුව විකාර වන්නට ඇත.
පාලක පක්ෂය විසින් කරුණා තම පාර්ලිමේන්තු මන්ත‍්‍රීවරයෙකු ලෙස පත් කිරීම සිදු කරන ලද්දේ මන්දැයි තේරුම් ගැනීමට ඇම්නෙස්ටිය පමණක් නොව තවත් බොහෝ දෙනෙකු උත්සාහ කරති. එහෙත් එය වචන වලින් තේරුම් කිරීමට හෙවත් සංකේතකරණය කිරීමට නොහැකි ක්ෂතිමය අත්දැකීමකි.
ජාතික ලැයිස්තුව හරහා පාර්ලිමේන්තුගත වූ කරුණා හෙවත් මුරලිදරන් මැතිතුමා එදිනම පැවති හදිසි නීතිය දීර්ඝ කිරීමේ යෝජනාවට පක්ෂව ඡන්දය ද පාවිච්චි කළේය. (මෙම ජාතික ලැයිස්තුව ඇති කරන ලද්දේ, සමාජයට සේවයක් කල හැකි, එහෙත් ජනප‍්‍රිය මැතිවරණ දේශපාලනයට සම්බන්ධ නොවන විද්වතුන් සහ වෘත්තිකයන් ව්‍යවස්ථාදායකයට පත්කරනු පිණිසය.)එපමණක් නොව ‘‘අපි අතීතයේ සිදු වූ සියළු දේවල් අමතක කරමු’’ යැයි කීවේය.
අතීතය යැයි ඔහු කියන්නේ කුමන අතීතය ගැනද? බොහෝ සිංහල ජනමාධ්‍ය සහ සමහර ඉංග‍්‍රීසි ජනමාධ්‍ය කරුණා හඳුන්වාදීමට කැමති ප‍්‍රභාකරන්ගේ ‘දකුණු අත’ වැනි ඔහුගේ හොඳම ගෝලයා ලෙසය; ප‍්‍රභාකරන් ගැන සියල්ල දන්නා පුද්ගලයා ලෙසය; කැලේ නසන්නට කැලේ ගසක්ම ඕනෑ වන්නා සේ එල්.ටී.ටී.ඊ ය විනාශ කරන්නට පාවිච්චි කළ හැකි පොර(ව)ක් ලෙසය. සමහර විට ඔහු අතීතය යැයි කියනු ඇ
ත්තේ සිංහල ජනමාධ්‍ය විසින් ම කලකට ඉහත වාර්තා කර, අපි ‘සත්‍යය’ වශයෙන් පිළිගෙන සිටි සිදුවීම් පිළිබඳ විය යුතුය.උදාහරණ ලෙස...
1. අරන්තලාවේ දී බෞද්ධ භික්ෂූන් වහන්සේ ඝාතනය කිරීම
2. යුද්ධයට මායිම් වූ ගම්මානවල සිවිල් වැසියන් ඝාතනය කිරීම
3. තමන් වෙත භාරවූ පොලිස් නිලධාරීන් අටසියයක් දෙනා ඝාතනය කිරීම
එහෙමත් නැතිනම්, එල්.ටී.ටී.ඊ සංවිධානය පාවාදී රජයේ හමුදාව සමඟ එක්ව කළා යැයි වාර්තා වන සිදුවීම් පිළිබඳ විය යුතුය.
උදාහරණ ලෙස.....
1. නැගෙනහිර පළාතේ ආයුධ සන්නද්ධ පැරා මිලිටරි කණ්ඩායමක් පවත්වා ගෙන යාම
2. බාලවයස්කාර ළමයින් සොල්දාදුවන් ලෙස බඳවා ගැනීම
3. පැහැරගෙන යාම්, අතුරුදහන් කරවීම්, වධහිංසා පැමිණවීම් සහ මනුෂ්‍ය ඝාතන
ඉහත සඳහන් චෝදනා සියල්ල තවමත් චෝදනා පමණක් බවත්, ඒවා ඔප්පු වී නැති බවත් එබැවින් නිර්දෝෂීභාවයේ පුර්ව නිගමනය මත ඔහු නිවැරදිකරුවකු ලෙස සැලකිය යුතු බවත් කියන ක්ෂමාලාපකයින් දැන් ඉදිරියට එනු ඇත. එහෙත්, අප ජීවත්වන්නේ රජය අපකීර්තියට පත් කරන සුළු ලේඛනයක් ප‍්‍රකාශ කළාය යන සැකය මත පවා පුද්ගලයෙකු දින නියමයකින් තොරව රඳවා තබා ගත හැකි තරම් බරපතළ ත‍්‍රස්ත මර්දන නීති ක‍්‍රියාත්මක වන ප‍්‍රජාතන්ත‍්‍රවාදී ජනරජයකය. එබැවින් ඉහත චෝදනා සම්බන්ධව පරීක්ෂණයක්වත් නොපැවැත්වීම විධායකය විසින් ගනු ලබන තීරණයකි. (අපට ඕන නම් නඩු දානවා, නැත්නම් දාන්නේ නෑ.) ඇම්නෙස්ටිය නොදන්නවා විය හැකි වුවත් ලංකාවේ නීතිපති දෙපාර්තමේන්තුව ස්වාධීන වන්නේ ඔවුන්ට ස්වාධීන වන ලෙස ආණ්ඩුව විසින් කියා සිටින අවස්ථාවලදී පමණකි.
දෛවයේ සරදමකට මෙන් මෙම නව මන්ත‍්‍රීතුමා පාර්ලිමේන්තුවට සම්ප‍්‍රාප්ත වන්නේ, ඔහුට විරුද්ධව ශ‍්‍රී ලංකාවේ රාජ්‍යය වෙනුවෙන් සටන් මෙහෙයවු සෙන්පතියෙකු වන මේජර් ජනරාල් ජානක පෙරේරා ඇතුළු පිරිසක් මරාගෙන මැරෙන බෝම්බ ප‍්‍රහාරයකට ලක් වී අවසන් ගමන් ගිය දිනයේය.
ජානක පෙරේරා යනු ලංකාවේ සම්මානිත යුධ වීරයෙකි. වැලිඔය සටනේදී එල්.ටී.ටී.ඊ. සටන්කරුවන් පන්සියයකට අධික පිරිසක් ඝාතනය කරමින් එක සටනකදී වැඩිම ගරිල්ලන් පිරිසක් මරා දැමීමේ වාර්තාවට හිමිකම් කියන්නෙකි. ජනතා විමු
ක්ති පෙරමුණ විසින්ද අසීරුවෙන් අමතක කර ඇති නමුත්, ජ.වි.පෙ. නායක රෝහණ විජේවීර මහතාගෙන් ‘‘ඔයාද විජේවීර?’’ යනුවෙන් අසා අත් අඩංගුවට ගත් පුද්ගලයාය. චන්ද්‍රිකා ආණ්ඩුව විසින් පැරණි මිනී වළවල් හෑරීමේ ව්‍යාපෘතිය ආරම්භ කිරීමෙන් පසු, මනුෂ්‍ය ඝාතන චෝදනා මත අධිකරණයට කැඳවූ පසු, අධිකරණය විසින් ” ජාතික වස්තුවක් ” ලෙස ගෞරවාදරයට ලක් කළ පුද්ගලයෙකි.අවසානයේදී කිසිඳු හමුදා කඳවුරකට ඇතුළුවීම පවා ආණ්ඩුව විසින් තහනම් කරනු ලැබ සිටි ඔහු ඝාතනයට ලක් වූයේ උතුරු මැද පළාතේ විපක්ෂ නායකයා ලෙසත්, ආණ්ඩුවට විපක්ෂ දේශපාලකයෙකුත් ලෙසිනි.
දැන් නැවතත් අපේ මූලික ප‍්‍රශ්නයට පිවිසෙමු. අපේ අදහස මේ මොහොතේ කරුණා පාර්ලිමේන්තුවට පත්කළේ මන්ද යන්න විෂය මූලිකත්වය තුළ සෙවීමෙන් පළක් නොවන බවයි. සමහරවිට මෙවැනි සිදුවීම් සිදුවන ලෝකයේ එකම රට ලංකාව වීමට පුළුවන. එයට හේතුව වසර 2500 ක් පැරණි අපගේ නිකැළැල් ශිෂ්ටාචාරය වීමට පුළුවන. අප පැවත එන්නේ ‘අබා’ ගේ පරපුරෙනි. අපට කළ නොහැක්කක් නොමැත. අපගේ වැනි රටවල් අතීතය පුරා දැක ඇත්තේ ‘සතුරන් ’ පමණක් බවත්, අපට ශිෂ්ට ‘අනෙකෙකු’ සිට නොමැති බවත්, හෙගල් නම් දාර්ශනිකයා පවසා ඇති අතර අවශ්‍ය නම් අපට හෙගල් යනු යුදෙව් චින්තකයෙකු යැයි කියා ගර්හා කළ හැකිය.
එසේ නම්, යුධ අපරාධකරුවකු වශයෙන් චෝදනා ලැබිය හැකි මට්ටමේ සිටින කරුණා පාර්ලිමේන්තු යැව්වේ ඇයි? අප යෝජනා කරන්නේ මෙම තීරණය ගන්නා ලද්දේ වෙන හේතුවක් නිසා නොව ජනතා විමුක්ති පෙරමුණෙන් පළි ගැනීමට බවයි. පසුගියදා පාර්ලිමේන්තුවේ ‘කෝප් ’ කමිටුවේදී ජ.වි.පෙ. පාර්ලිමේන්තු කණ්ඩායම් නායක අනුර කුමාර දිසානායක මහතා විසින් ජනාධිපති ජ්‍යෙෂ්ඨ උපදේශක බැසිල් රාජපක්ෂ මහතාට අභියෝග කළෝය. පසුගිය අවුරුදු තුන තිස්සේ වෙනත් අයට අභියෝග කිරීමට මිස අභියෝගයට ලක්වීමට පුරුද්දක් නැති බැසිල් මහතාට මෙයින් විශාල කෝපයක් ඇතිවිය. ඒ අනුව දශක හතරක් තිස්සේ රටට කිසිවක් නොකළත්, ‘තම පිරිසිදු’ බව ගැන වඩාත් සවිඥානික සහ එය ආරක්ෂා කර
ගැනීමට විශාල වශයෙන් වෙහෙසෙන ජ.වි.පෙ ට ගිවිසුම අනුව හිමි ජාතික ලැයිස්තු මන්ත‍්‍රී ධූරය කරුණාට ලබාදීම මඟින් ජ.වි.පෙ ලැජ්ජාවට පත් කළේය. මෙම පුද්ගලික පළි ගැනීම තුළින් මිස වෙනත් ආකාරයකින් කරුණා පත් කිරීම තේරුම් කිරීමට නොහැකිය.මෙම පත්කිරීම ගැටලූවක් වන්නේ ‘සමහරුන්ට’ පමණක් යැයි අප ලිව්වේ ඇයි දැයි පැහැදිලි කරමින් මේ ලිපිය අවසන් කරමු. එයට හේතුව විශාල පිරිසක් මේ වන විට ” ඔහොම යං, ඔහොම යං ” කීමට හෙවත් මේ සිදුවන ක‍්‍රියාවලිය යුක්ති සහගත යැයි කීමට තීරණය කර තිබීමයි. ඔවුන්ට අනුව තමන් අතීතයේ කළ කී දේ සියල්ල සමඟ තමාද විනාශ වුවත් ඔහොම ම ඉදිරියට යා යුතුය. ඒ අයට මෙය කිසිඳූ ප‍්‍රශ්ණයක් ඇති නොකරයි. ඔබට නිදසුන් අවශ්‍ය නම්, සතියේ දිනවල උදේට ලක්හඬ අහන්න, සති අන්ත පුවත්පත්වල දේශපාලන විග‍්‍රහය කියවන්න.
back to HOME....
No comments:
Post a Comment